ताजा समाचार
शहिद दिवसका अवसरमा सन्देश
सबै व्यक्तिको आत्मसम्मान सहित बाँच्न पाउन अधिकार सुनिश्चितताको वातावरण सिर्जना गर्न मुलुक र मुलुकवासीका लागि आफ्नो अमूल्य जीवन बलिदान गर्ने व्यक्ति नै शहीद बन्न योग्य हुन्छन् । नेपाल र नेपालीलाई स्वतन्त्र र सार्वभौम सम्पन्न बनाउन विभिन्न कालखण्ड, युद्ध तथा संघर्षहरुमा आफ्नो अमूल्य ज्यान आहुति दिने ज्ञातअज्ञात सबै महान शहिदहरुको बलिदानी र त्यागको फलस्वरुप आज हामी संघीय लोकतान्त्रिक गणतन्त्र नेपालको सार्वभौमसत्ता सम्पन्न, स्वतन्त्र, स्वाधीन र स्वाभिमानी नेपालीका नामले कहलिन पाएका छौं । शहीद दिवसका अवसरमा राष्ट्रहित, लोकतन्त्र र अग्रगामी परिवर्तनका लागि नेपाली जनताहरुले पटक-पटक गर्दै आएका सशस्त्र युद्ध, ऐतिहासिक आन्दोलन, सशस्त्र संघर्ष, त्याग र बलिदानका गौरवपूर्ण इतिहासलाई स्मरण एवं शहीदहरु प्रति श्रद्धाञ्जली र घाइते, अपाङ्ग सबैलाई उच्च सम्मान व्यक्त गर्न चाहन्छु ।
दिगो आर्थिक विकास सहितको समृद्ध नेपाल र सुखी नेपालीको राष्ट्र बनाउने शहीदहरुको महान सपनालाई साकार पार्न सबै राजनीतिक दल र पदाधिकारीहरु, राष्ट्रसेवक कर्मचारी, नागरिक समाज, शिक्षक, बुद्धिजिवी लगायत आम समुदायले एकपटक छातीमा हात राखेर, नेपाली धर्तीको माटो समाएर, तेरो-मेरो भन्ने भावनाबाट मुक्त भएर राष्ट्र निर्माण र राज्य निर्माणमा महत्वपूर्ण भूमिका निर्वाह गर्ने गाउँपालिका निर्माण गर्न गाउँपालिकाबासी सबैमा विशेष अपिल समेत गर्दछु ।
रामसुर बुढा मगर
अध्यक्ष, भूमे गाउँपालिका रुकुम (पूर्व) परिवार
मितिः २०७५ साल माघ १६ गत्ते
